Emmaus pigo ah hteit ba ci goi

Emmaus lam k’hteit goi-ah ng’dáng ci.
A Cu k’hngüp mät, ngamí-ung-kah lí-kah k’chukkip vai güt hla ci-ah, Emmaus pigò-ah hteit zah ci goi, 14 Kia te ci-ah màwng gùi cuh nganí ani mät nawh ani hteh hlu-ah piéin ci goi. 15 Ngani cuh, ng’htà neh ani ng’cuh zah-ung, Jesu mät hmä lo neh nganí-awn m’gù tu ci. 16 Báwi-ah a kia cuh k’síng bà khai-ah kä m’dèi m’dàng ci goi. 17 Báwi nawh phih, “Nani hteh zah-ung, a i cuh, nani piéin ci?” ci neh ng’si goi hleih,
18 Cleophas ng’mingnak ci nawh, m’sàng bà neh a piéin cuh, “K’Hngüp goi k’thùm a na akia vü ci-ah màwng gùi kä hmat tu ci tah Jerusalem ’chin gùi-ung, nang bäng-ah vah na kia phia ci,” ci ci. 19 Báwi nawh phih, “A i-ah màwng cun ang?” ci hleih ani piéin bà cuh, “Khãnpùghí-ah mà, k’chàng gùi-ah mà-ah a i phih m’chüt neh ce ng’sä-ah kia ci-ah, Nazaret Jesu-ah màwng,” ci ci goi. 20 K’Tài-gü ng’vái gùi lah, kami Báwi gùi nawh ngáwn vai-ah àp u hleih ami kiàng-ah màwng, 21 Keimi läí nawh ani cuh, Israel k’chàng gùi k’phión gùi khai ci-ah kami äp te ci. A cun-ah a kianák k’hngüp k’thùm lo lo pi ci. 22 Cun tu pang-a phih, k’hngumí a m’sah nawh phih na m’cäí m’cãt gùi ci gùi. M’Cim-hngün-ah, khàw kä thai pha hleih gok khai gùi-ah hteit ci gùi. 23 A gáwk kä hnguh u neh lo u neh “Báwi ghing ci,” ci neh piéin ci-ah Khãnhtapup gùi ami hnguh-ah màwng piéin ci gùi. 24 Cun kon-ah, keimi gùi-ung-kah a m’sah, m’cim-hngün-ah hteit u neh k’hngumi gùi-ah piéin-a hlo-ah hnguh tu ci gùi. Cun tu pang-a phih, Báwi cuh, kä hnguh tu ci gùi. 25 Báwi nawh phih, “’Ce ng’sä gùi-ah piéin gùi phùng kä zùm hlü ci gùi-aw, 26 Christù cuh asin gùi, àwt neh a mät-ah bänák-ah hteit khai-ah kä kia ci-ang?” ci neh piéin nehtah 27 Moses-ung lèng neh ce ng’sä om ci phùng nawh a mät-ah màwng ami guk gùi cuh, k’phlàn pe goi ci.
28 Ani htehnák-ah pigò pèi-ah gok lo u neh Báwi cuh ng’täì neh hteit khai-ah pong hleih, 29 nganí nawh, “Keiní-awn om tu cang-ä. Khàw va ng’kòn neh mü lo hlü pi ci,” ci neh líng neh cho tu ni hleih nganí-awn a kong ät-ah lut tu ci. 30 K’Pé m’sõn- ung nganí-awn a kong ät-ah ngoh tu neh m’htut la neh k’tài-gü süm hmat pe nehtah k’bõ neh a péit goi zah-ung, 31 ani mik a k’cäí-ah m’dèi neh Báwi-ah a kia hmat ci goi. Báwi cun phih, ani mà-a kah maih ci. 32 Ani mät nawh piéin ni neh, “Lam-ah m’cäinák-ah màwng a piéin zah-ung, ni m’lung cäí ci-ah kä kia ci-ang?” ci ci goi.
33 A cun zah mät-ung ng’düí lo bà ni neh Jerusalem-ah hteit bà ni neh gha-lei-ät lah, om tu ci gùi ami ng’bum cuh, hnguh ci goi. 34 Ngamí nawh, “Báwi ghing bà k’càng ci. Simon-ah ng’dáng ci,” ci u hleih 35 Nganí nawh phih, lam-ah kia ci gùi phùng lah, m’htut a k’bõ zah-ung, a i-ho k’chà, Báwi-ah a kia ani hmat-ah màwng, piéin ci goi.

Add new comment

7 + 3 =