A-k'thum nak kyün k'hngüp

Jesu nawh Ngá k’sùi, sing k’phlì chü gùi ci.

 Johan pha neh ami chúm ng’za neh Jesu cuh, Galilee khàw-ah hteit bà nehtah 13 Nazareth nawng ghüt neh Zabulon lah Nepthali khàw ng’gü, tui ’kàm pèi, Cãrpha naum pìgò-ah lo neh om ci. 14 Cun cuh ce ng’sä Isaias-ah piéin a bé vai-ah phäh-ah kia ci. 15 A piéin cuh “Zabulon lah Nepthali khàw  tui ’kàm  pèi Jordan tui nú vang ’kàm-ah  khúi hei gùi-ah Galilee khàw, 16 A k’hmüpnák-ung om ci gùi nawh a ’khãng-nú hnguh ci gùi. Sih-nák nawh a sùng gùi-ah k’chàng gùi ung a ’khãng dáng lo ci.” 17 Jesu nawh “Ng’zu bà vä. A i-ah kia hleih ci-ung, Khãnmòpí khàwcuh ng’et lo ci néi,” ci neh m’thei m’cäi lo gùi ci.

Cun zah ung Jesu, Galilea tui lì pèi-ah, a hteh zah ung ng’phäí-nàü goi, Petru ci neh chü-ah Simon lah, Andrew, hnguh goi  ci. Ngá k’sùi-ah kiani neh ani ng’vài cuh, tui lì ung vòi zah te ci goi. 19 “Ka hlu-ah lo tu nä. Ngá-ah kä kia bà hleih, k’chàng mät ka ning pha hlak goi khai,” ci neh  ghüh goi ci. 20 Ngani nawh phih, a k’tén-ah, ani ng’vài gùi nawng ghüt neh ani läk tu ci goi. 21 A hei pèi-ah, hteit bà säng nehtah Zebedee-ah htá, Jácob lah, Johan, a hei ng’phäi-naü goi, hnguh bà mä ci. Ani pá Zebedee mah-ah, ng’hlèi-’ko tumat ung om u neh ami ng’vài gùi piàng bà zah te ci gùi. Chü goi hleih, 22 Ngani nawh phih, a k’tén-ah, ani ng’hlèi-’ko lah ani pá, nawng-èin ghüt neh ani läk tu ci goi.

23 Jesu nawh zèi vai-ah k’chü, khãn khàw-ah màwng cã-gat gùi ung m’thei m’cäi gùi neh go pàinák a hlü hlü ung-kah, k’chàng gùi m’zèi m’gái bà gùi neh Galilee khàw púm-ah hteit ci.