Bä ca Augustine a mong

Bä ca Augustine cu Christu kum pyathumkip lah hmakipleipli, Novenber ghaleithum ung Hliip Africa, Tagate manggio ung k’tui lok’ca kia ki. K’nung’be thum a mi lo nak ung ka a ni cu a vaipi a kia ki. A ni cu a k’hmo hta zah ge ung a hteihpüi awn ng’pong neh m’gugheim, eioktat ung yeikiai neh a yum ghong ca a pa a hlo ah ani cun phih kia tu ca kia ki. Cun kona mä a hei hngumihta gui awn yeikiai neh ta ngumihta tumatawn a hmo tumat gah ki goi ah kia k’ki. A ni noh aa bi mang nah khatnak a ii kä om ein kai ah a m’lung hnga, omk’ih gui diidam man te ca kiak’ki. Kawhngüp ät ung Bä ca Augustine cu a nu ah miktui m’hlon neh a taigü nak  kon  a ni cu a m’lunghngaa ng’hlat lo ca kia ki. Bä ca Anthony ah ghinlu a mong a phat kon a m’shiinak Saramentu khan tuk khai ah am’lung phupit ca kia ki. a khokum m’kuleiko ung Roma manggio ah hteit tu neh a nu a shih awn ah Africa hliip khaw ah hteit ba ne k’taigü Boi ah kia lo ki. a cunkonnah Christukum pyaathumkip lah kokipleighüih, a khokum plikipleiät ung Hippo Manggio ah Taigümang a kia lo ca kiak’ki.

Augustine noh (Confessions) ci ah a mäta a mong k’bäi neh a guk nak ung, a nu noh a ni ka vai ah a miktüi gänap neh a taigü man gui a mong cun phih miktui ng’hlui ah gu man ca kiak’ki. Augustine cu khawm’dek a khan ah guhhmat nak ung ghuih ca chang tumat a kia ki. Christian yumnak lah gukthen nak ung k’chüih ne kä diidam hnging khai ah a phu däm ca ng’thu k’däm ca nu gui cu guthen hnging ca kia ki. A ni cu Christukum pyaaplikip lah thumkip ung shik ca kia ki.