A k'ni ah om ih vai among

kä ’ká hleih ng’zo ng’póm neh kä om vai among.
’Khúi hei gùi hngo-ung kä om ci-ah om-’kà, ng’zo ng’pómnák gùi, nangmi- ung om ci-ah ng’zák lo aih néi bäi. Nangmi-ung tumat nawh a pá-ah k’chu tu bà hngo om püi ci. 2 Nangmi phih, nami mät i boh ng’hlùi-ah nami ng’séi ci. Sin-ah kia ci-ah k’chàng nami hngù-a kah a hläih vai-ah a m’ci-vik-ah nami kia-èi vah ng’mang tu bà khai hlü. 3 Ka mät läi, käü i-ah ng’sawng neh ka om-ung phih, ka mät käü-sing mät ka om tu ci vai hlü-ah, ka m’lung-am thüi na tu neh cun-a hlo-ah om kia ci gùi phih, ka gen tu gùi pi ci néi. 4 Mi Báwi Jesu-ah ng’ming-awn, nami ng’bum täi hleih ng’Mùi-ah om tunák lah, mi Báwi Jesu-ah k’tha gui-awn, 5 Käü-hngùn mät a m’di vai-ah, cein-a hlo k’chàng, khaw-’nget-àm m’àp vä. Cung vah, Báwi-ah k’hngüp-ung, a hngùn phiòng hnging khai.
6 Nami mät-ah zèi zèi-ah nami kia tah ng’tüi chei ci. K’Có a ng’büh nawh m’htut a púm pûng hlak ci cuh, kä nami hmat ci ang? 7 Htén-ah kia neh m’htut a k’thài-ah nami kia hnging vai-ah, k’có k’phiüm ghot vä. I-ah kia hleih ci-ung, Paschael Htò htá Christu cuh, ngáwn-thãnák pi néi. 8 Cun-ah kia hleih, k’sé ’kà lah k’so k’sé i-pang kä cum bòi-èin tu hleih ni lah càngnák-ah m’htut bäng-awn, mi goh ng’sài, mi èi áwk vai ù.
9 Ka guknák-ung, a k’sé-ah om ip ci-awn kä nami ng’pàk-èin tu vai-ah ka ning guk gùi te. 10 Sin-ah khaw m’dek-ung ng’zo ng’pòm ghet ghet ci gùi päng, ng’ung ng’tak ci gùi k’bäít, ami om kä zäih ci gùi, ng’zó-khaw sum-chuk ci gùi pang-am, kä ka guk gùi ci. Cun cuh nami mät sin-ah khaw m’dek-awn nami m’cha tu hngá vai ng’zák hlü phäh-ah kia khai. 11 A k’càng-ah ka piéin hlü cuh ng’zo ng’pòm ghet ci, ng’ung ng’tak ci, ng’zó-khaw sùm-chuk ci, hlè ci, áwk k’tat ci, om kä zäih ci-awn kä nami ng’con-èin tu vai; cun-a hlo u pang-awn tah ei hngo kä nami vun-èin vai. K’Chàng hei m’kat tu vai tah kei nawh ka ci tu vai-ah kä kia ci. Kia neh ang? Cun-ung phih, a hei gùi m’cha m’lang tah Khãnpùghí-ah ma-màwng néi. Sin-a hlo-ah k’chàng om ’kà gùi, nami hngù-a kah nami k’täm gùi vai néi.