K'khangpughi m' hni nak lah paw k'chang gui m'hni nak cuh mik mi Christians gui ah mi ghün-om nak ah a k'tung pi ah mi ng'yung nak ah kyak ci ciah Papashangpughang no na m'thei m'cä gui ci. Bawi Yeisu ah a m'thei m'cä nak ung phih m'hni nak ung a van ng' yung ciah kyak ci.

Bawi Yeisu no a na m'thei m'cä gui a van cuh mik-ui on kä mi hnguh hing ah m'hni nak mong gawi ung kyum be ciah kyak ci. K'khangpughi mi m'hni nak cuh m'tai-güi nak lah a kung pi ah k'khanpughi mi m'shuk-chuk nak on mi m'dang ciah kyak ci.

Mi paw k'chang gui mi m'hni nak cuh k'chang gui mi gung tot tu gui ni, a mi k'chüi k'aw mi ng'ngaih tu pe gui ni on mi m'dang ciah kyak ci ciah Papashangpughang no pyein ci. A cun ah m'hni nak ah a ng'yung cuh Bawi Yeisu mät ah kyak ci ciah pyein ci.

Hti-then hleih mi ghün om nak vai lah a k'ni lam täng ah mi ng'thong ng'hlat nak vai ah mong lam cuh mi paw k'chang gui mi m'hni nak hlu lam ah mi ghah hing hi m'dang hing ciah kyak ci ciah pyein ci. Mi paw k'chang gui ka via ah mi m'lung mi khai ah kya ung Bawi Yeisu ah hlu-läk ah kä mi kya hing ci ciah pyein ci.

K'khangpughi ah k'chü-m'gein nak no mik mi gui k'tha gui kä na m'kyein hlak gui ci, a cun no k'khanpughi ah ng'thu k'ni läk neh mi ghün om vai ah a hngüp tä hleih na chü ko ba gui thi ciah kyak ci ciah Papashangpughang no na m'thei m'cä gui ci.