A van ka vai ah k'tai-güi vai ah mong.

Mi k'tai-güi ah kya ung mi paw k'chang gui ka vai ah phih mi k'tai-güi tu pe gui vai hlü ci ciah Papashangpughang no na m'thei m'cä gui ci.

K'chang gui ah ng'ä-ng'cä nak gui, k'chang gui ah a mi ng' ngaih-u gui, k'chang gui ah thüi-hlei nak gui lah yei kyai nak gui a van ät hlak ciah suh-shan nak ah kä kya ung mik mi gui ah suh shan cuh mi ng'shei ah kyak ci ciah pyein ci.

I ah kya hleih ci ung, mik mi gui cuh mi paw k'chang gui ah tah mi ni-bä tu ba ciah kä kyak ci, mik mi gui cuh kat nak gui, yai ca nak gui om ciah ng'phä-ng'na nu-be gui yop ah kyak ci ciah pyein ci.

Suh shang ciah k'chang gui cuh a ng'däih ah a mi m'lung k'shoh k'hmong ci gui ah kyak ci ciah pyein ci.

Ngami gui cuh suh kä shang ci gui ni, i la hok cha ah suh a mi shan vai kä hmat ci gui ni, kat nak bi neh a mi lam k'hmaih ci gui ka vai ah suh shang ci gui ah kyak ci ciah pyein ci .

A cun ah kya hleih ngami gui cuh  k'chang päng van ka vai ah suh shang u neh Bawi Yeisu ah hmai cuh yai ca ciah k'chang gui ung huk ci gui ah kyak ci.

Mi paw k'chang gui mi m'hni nak ah m'lung on suh mi shan vai hlü ci ciah Papashangpughang no pyein ci.

K'khanpughi ah ma ah a u phih kä mi hti-theing ciah kya hleih kat nak bik ci gui cuh phih kä mi nong en neh a van ka vai ah suh mi shan vai ciah pyein ci.

A htin-taw no phih k'chang päng van ka vai ah suh shan nak cuh bi loh ciah kyak ci.

K'chang gui ka vai ah suh mi shan pe gui cuh k'khanpughi ah m'lung, mik-ui lah kä  mi huh hing ah k'khanpughi ah hip-hmoi nak lah k'chü-m'gein nak on nga mi gui cuh mi ghuin gui ah kyak ci ciah pyein ci.

https://bit.ly/34mgJpb