2023 kum ung World Youth Day bi vai ah mong.

2023 kum, Lisbon mang-go ung a mi bi vai ah a m'ku-lei-k'cheit nak (28) World Youth Day (WYD) cuh k'tha-gui a k'be on bi loh vai ka ng'ya hlük ci ciah Papashanpughang Francis no pyein ci.

A cun ah World Youth Day (WYD) ung ah k'chang mät ah phih kyai, digital media ung ka no phih kyai a van a kyum ät tu vai ah Papashangpughang no chü-thäm gui ca kyak ci.

August k'cha a k'tük nak (1) ung ka no a k'chuk nak (6) ah chüt hleih World Youth Day (WYD) cuh Portugal mang-go ung bik khai gui ah kyak ci.

A cun ah World Youth Day ung ah khaw m'dek pum ung om ca Catholic k'hmo k'tho gui on a mi ng'hnguh vai ah Papashangpughang no güng-kyo cia kyak ci.

Portugal ghuin khaw, lisbon mang-go, Fatima khaw ung a van mi ät neh mi ng'kyum nah vai cuh ka hteng cheng-geng ci ciah Papashangpughang Francis no pyein ci.

World Youth Day cuh Papashangpughang lah khaw m'dek pum ung om ca k'hmo k'tho ghui no a mi ng'hnguh nak, k'hmo k'tho gui ah poi, khaw m'dek pum ung om ca Catholic a htin-taw ah mong m'dang nak lah k'hmo k'tho gui no k'khanpughi ah mong a mi yum nak a mi m'dang nak ah kyak ci.

Shin ah World Youth Day cuh kum goi, kum k'thum, kum k'phi ung k'hmä ät hti ah a mi bi ah kya neh Papashangpughang mät pa hleih Papashangpughang no a ghü ah mang go ung a mi bi hti ah poi ah kyak ci.

World Youth Day cuh papashangpughang John Paul II no 1985 kum ung tün neh a bi lo ma ah kya neh a cun ah poi ung kyum ät ci gui no khaw m'dek pum ung om ca a htin-taw ah mong a mi m'dang nak lah Bawiyeisu on ng'chum nak vai ah lam na m'shüm gui ca kyak ci.

Shin ah WYD bi nak ah ghuin khaw ung yum nak (faith), ng'ngaih u nak (hope) lah (charity) m'hni nak a yat lo vai, k'hmo k'tho gui k'tha-gui ami gah nak vai lah khaw m'dek pum ung dim-kyäp nak (peace), ät nak (unity) lah ng'khong-gei nak a om lo pi hti vai ah phäh ah kyak ci.

A yan ung WYD a mi bi nak gui ah ghuin khaw (mang-go) gui cuh Cologne, Germany (2005), Sydney, Australia (2008), Madrid, Spain (2011), Rio de Janeiro, Brazil (2013), Krakow, Poland (2016), lah Panama City, Panama (2019) ah kyak ci.

https://bit.ly/3KNvzbh