Cümong pyein k'hlak bi loh ci gui on Papashangpughang no a pyein ah mong.

A päng päng a mi k'chü-k'ko gui, a mi pyein-hlak gui ah li ah Christian cümong(Journalist) pyein-hlak biloh ci gui no htin-ling neh, cang nak (truth) cuh a mi m'dang hlu ah ngawi ah ka vai yum-äp nak lah ng'ngaih-u nak k'kot-chang ciah k'chang gui ah kya neh a mi ng'bi-ng'loh vai ah Papashangpughang Christian cümong (Journalist) gui cuh chü-thäm gui ciah kyak ci.

  A htin-taw ah m'thei-m'cä gui ni htin-ling nak lah cang nak gui ah mong cuh kä pyein-k'she en neh kä ng'kho-ng'chei en neh  bi loh vai hlü ci ciah pyein ci. Cheistian ng'bung gui ah ng'lung ung lüng-tai neh a k'ni a k'thai ah ghün-om nak vai lam ung kyum-päng neh na mi boh ciah kyak ci ciah Papashangpughang no (Journalist) Cümong pyein-k'hlak nak ung bi boh ci gui on m'thein m'cä gui ciah kyak ci.

M'gong-m'lei neh ng'pyein gui no ng'bum hta neh mi om ih nak ah m'lung k'shoh na khai pe gui neh a htin-taw ung ät nak a om nak vai hlü cun phih m'chei-m'shoh neh m'di ciah kyak ci. Khaw-gam cuh m'gong-m'lei neh ng'pyein nak ung a ng'vai pi ah kya neh k'chang gui kä ni gui ah mong cuh hteit ghü ghü neh ng'pyein ciah kyak ci. I ah kya hleih ci ung, khaw-ng'nget cuh hlei ciah kya neh a htin-taw ung k'chang gui a mi ät vai m'chei-m'shoh ciah kyak ci ciah Papashangpughang no na m'thein m'cä gui ci.

Cümong pyein k'hlak bi loh ci gui cuh k'chang gui no a mi bi loh pyein-hlak gui ah mong cuh kä m'yih-m'thuh en neh, kä bo-pai en neh hting-ling neh cang nak on a mi bi loh vai ah k'khangpughi no a chü gui ah kyak ci ciah pyein ci. A päng a hlü a mi pyein gui ah ng'lung ung, k'chang gui ung om ciah kyom-tang nak gui, k'chang gui ah mi bä gui cuh k'chang gui on mi m'thein-m'kan mi pyein-k'hlak vai hlü ciah kyak ci ciah Papashangpughang no na m'thein-m'cä gui ci.

Cümong pyein hlak bi loh ci gui no khaw-m'dek khan ung a mi om kya gui cuh k'hip-mhoih ciah m'lung on a päng avan cuh ng'ching-ng'khong neh om ci ciah hu-hteng neh a mi bi loh vai ah k'khanpughi no a chü gui ah kyak ci ciah pyein ci. A cun ah kya hleih, Christian cümong ung pyein-hlak bi-loh ci gui cuh ngawi ah ka vai ah ng'ngaih-u nak lah yum-äp nak m'kawin-tha ci gui ah a mi bi loh vai hlü ci kyak ci.

Christian Journalists gui cuh a k'ni pi ah ngawi-gawi ung ng'ngaih-u nak ah m'shi phuu khai gui ah k'khanpughi no a chü gui ah kyak ci. Shin gui cuh tuh chü Lei a hlo-kang yah ung bi-loh vai hlü ciah kyak ci. Media no k'chang gui kä om vang nak on kä mi go-pyam en vai ah k'chü-k'ko on aw-mai tu neh gung-tot tu hing ci gui ah kyak ci ciah Papashangpghang no na m'thein m'cä gui ci.

https://www.vaticannews.va/en/pope/news/2020-09/pope-francis-tertio-magazine-audience-christian-journalist-media.html

 

Add new comment

15 + 2 =