Go-pyam ci gui m'htei vai ah mong.

Go-pyam ci gui m'htei gui cuh m'hni nak ah mong cuh a I ah hlo ang ci cuh ng'thei-ng'thang nak ah kyak ci ciah Papashangpughang no na m'thei m'cä gui ci. K'chang tumat cuh a shih ah chüt ah (good Samaritan) nah bi ah hlo ah  m'htei m'hta vai, yei nak vai ciah pyein ci. K'chang tumat kä m'tui-m'hleih hing vai, kä gai-gong ba hing khai ah a go-pyam ah phäh ah a cun ah k'chang cuh m'htei neh kä gah ah kä kyak ci ciah pyein ci. A htin-taw no phih a cun nah na m'thei m'thang gui ciah kyak ci ciah pyein ci.

K'chang tumat ah hngun cuh go-pyam neh yai-ca aih neh a mät no ka hngun na m'shih en vä ciah a ng'shan ung phih a ni ah a hngun cuh u noh k'hleh pet neh kä gah ah kyak ci. A cun ah kya hleih mät no mät ngon (suicide) lah (euthanasia) ciah k'chang tumat a m'lei lo hleih aih hleih k'chüng-na hleih a hngun m'shih pet gui cuh a htin-taw noh kä bi vai ciah na m'thei m'thang gui ciah kyak ci.

Tuh chü, k'chang gui a k'daa cuh a mi mät no a mi mät pep u neh a mi ghün khaw gän-ap u neh go-pyam neh yai-ca gein vai ci gui ah k'chang gui m'htei tu ci gui, gung-tot ci gui a k'daa mi hu gui ciah kyak ci. A cun ah go-pyam neh yai-ca ciah mi paw k'chang gui mi gung-tot tu gui cuh m'hni nak ciah mong cuh mi ng'thei-ng'thang ah kyak ci ciah pyein ci.