A htin-taw mi m'hni vai ah Papashangpughang no na chü-thäm gui ci.

 (Catholic) a htin-taw mi m'hni vai ah Papashangpughang no na chü-thäm gui ciah kyak ci. I ah kya hleih ci ung a htin-taw cuh mi im ah kyak ci ciah pyein ci. A cun nah kya hleih Bawi ah a htin-taw cuh na mi m'hni vai, na mi yei nak vai nei ciah Papashangpughang no pyein ci.

A htintaw cuh htitheing ciah im ah kya neh yum tu ng'bum gui a van a mi ät nak ah kyak ci. Mik mi gui tumat hti cuh ät yop neh mi ng'bi ghom neh, ng'khai-ng' lang nak on htithein ciah k'khanpughi ah om nak kah im ah a kya vai ah a cun ah a htintaw no na chü thäm gui ciah kyak ci ciah pyein ci.

K'khanpughi ah k'kyong khui tumat ung mi om ghom ci gui ah mik mi gui a van no a htintaw mi yei nak vai, mi m'hni vai hlü ci ciah pyein ci. K'khanpughi ah a bi loh ma mong cuh mik mi k'chang gui a van cuh k'kyong-khui ät ah mi kya neh k'khanpughi on mi ät tu yop neh mi ng'ngaih gep hleih mi ghün om vai ah phäh ah kyak ci.

A htintaw cuh k'chang gui a pi noh kyum ät neh a mi bi ah a ng'bum tumat düt ah kä kyak ci ciah pyein ci. A htintaw cuh k'khanpughi mät ah tü-pyan ah kya neh shing m'kang k'tung ung ka no ng'tü om lok ciah kyak ci. Cun kon ung Bawi Yeisu k'htei on a mi shuin nak ah a vei ung ah luit lok ciah shi lah tui cuh (Baptism) m'shi nak ah sacramentu lah (Eucharist) Bawi ah shi-hla Sacramantu ah (symbol) ah kyak ci ciah pyein ci.

A m'shah no Bawi Yeisu ka yum ci, a htintaw kä yum ci, k'khanpughi ka yum ci, Bawi phaya gui kä yum ci ciah pyein ci gui ah kyak ci. A cun Papashangpughang no a m'shang nak ba cuh i ang ci un, a htintaw no wah Bawi Yeisu ah om nak ah lam na m'shüm gui neh na khah pui gui neh k'khanpughi cun phih mik mi gui on na thak lo gui ciah kyak ci ciah pyein ci. K'chang ah kya nak gui a om tu pang ah phih,a htintaw cuh k'khanpughi ah htaa gui ah k'kyong khui k'däm ah kyak ci ciah pyein ci.

A cun ah a htintaw ung mi om ciah, a htintaw mi pyan ciah k'tai-gü bawi gui ni, yum tu ng'bum gui ung cuh mi kat nak gui, a hlü nak gui cun phih om khai ah kyak ci. Cun hte, mik mi gui no kä mi k'hmih en vai cuh, mik mi gui a van ung hma-kat nak gui om ciah kya neh k'khanpughi ah k'phyoin nak lah k'chü-m'gein nak mi gah u neh mi ghün om ci ciah mi ng'ngaih-tüh pawk ah kya ung mi hang ghün om cuh kyom-tang ciah kyak ci. I ah kya hleih ci ung k'khanpughi no mi hma-kat na na k'phyoin gui ci ci-cuh kä mi k'hmih en vai hlü ci ciah pyein ci.

A htintaw cuh mi Nu ah kya neh a ni no ghün nak a k'thai na pe gui neh Bawi Yeisu ah na khah pui gui ciah kyak ci ciah pyein ci. Mi Nu ah kyak ciah a htintaw ah hmai ung kat nak gui a om ma kya ung phih mik mi gui no a ni cuh kyom tang pi khai ah, a hmai k'khang khai ah mi gung tot mi pyan tham vai hlü ci. i ah kya hleih ci ung a thintaw no shin ah khawm'dek pum ung k'khanpughi ah m'hni nak a m'dang hing vai ah phäh ah kyak ci ciah pyein ci. A cun na kya hleih a htintaw cuh mi m'hni vai, mi yei nak vai hlü ci ciah pyein ci.

A htintaw cuh mi k'kyong khui  vai hlü ah mi m'hni vai hlü ci ciah pyein ci. Mi k'kyong khui ung mi nu-paa, mi phä, mi pai a k'hmo gui no kat nak gui a mi bi, kä ng'hlawi nak gui a om tu pang ah phih mi k'kyong khui mi yei nak, mi ghuin m'hei ah hlo ah a htintaw cuh mi k'kyong khui vai hlü ah mi ghuin-m'htei vai, mi m'hni vai, mi yei nak vai hlü ci ciah pyin ci.

A htintaw a di dam vai ah hlei hlak nak gui, m'lung uih gui on tu-aat ci gui cuh m'hni nak lah suh shan nak on mi tuk-aat tu ba gui vai ciah pyein ci. A htintaw ka vai suh na mi shan vai a ni na mi m'hni vai, i ah kya hleih ci ung, Bawi Yeisu lah ahtintaw cuh tumat ah kyak ci gui, ät ci gui ah kyak ci ciah Papashangpughang Francis no na m'thei m'cä gui ciah kyak ci.

https://bit.ly/3lNGTaZ