Papashangpughang no a na m'thein m'cä gui ah a mong.

A ghüi ng'vai lo gui (the elderly) i ah kä hlui-tä ca k'chang cuh k'chang gui a van i ah kä hlui tä tuk ca kyak ci, a ghüi ng'vai lo gui (the elderly) i ah kä hlui-tä ca k'chang cuh a mät no a mät phih i ah kä hlui tä ca k'chang ah kyak ci ciah April k'cha (20) k'hngüp ung pa-hta k'chang gui on a mi ng'hngüh nak ung (general audience) Papashangpughang no na m'thein m'cä gui ci.
St.Peter Square ung ah pa-hta k'chang gui (piblic audience) on a mi ng'hnguh nakcuh Covid-19 lei a hlo lo ung ka no tün neh ng'düm hte ci, khaw kum goi ng'lak lo na hleih tu bäh cuh a k'ma pi k'bäh ah pa-hta k'chang gui on St.Peter Square ung a mi ng'hnguh nak ba ah kyak ci.
A ghüi ng'vai lo gui lah nu-pa gui hlui tä gui cuh (Honor, respect) nga mi ah a mi bä khäk nak cuh (dignity) bäi tu gui neh yei kyai nak gui ah kyak ci ciah Papashangpughang no pyein ci.
K'khanpughi ah a m'cä mong gha (10) ung ah ak'phli nak (4) ung "na nu lah na pa cuh na yo-htei vai" (Honor thy father and monther) ci cuh nu pa gui bäng ah kä kya hleih a ghüi ng'vai gui ah kyak ca mi pughi pighi gui van pyein ah kyak ci ciah Papashangpughang no pyein ci.
M'hni nak kä om neh pyein k'she nak gui a om lo ah kya ung (honor) ciah paw k'chang hlui tä nak cuh phih kä om lo ba ca kyak ci ciah pyein ci.
A ghüi ng'vai gui ah kä ng'hloi ng'hlak hleih a mi ng'ta ng'ko bi loh gui cuh kä mi pyein k'she en na gui neh m'hni nak on mi m'htei tu gui vai hlü ci ciah pyein ci.
Nu Pa gui no phih na mi hta-k'hmo gui cuh ghüi ng'vai lo neh go-pyam ci gui ah a ng'vai gui ah om nak ah na mi hteh ton hlak gui neh nga m gui om u hleih vaih mät phih ghün om lo tu ci neh a mi hmat vai ah na mi m'htei gui vai ciah papashangpughang no pyein ci.
A ghüi ng'vai gui i ah kä hlui tä gui neh, nong gui düit cuh kat nak a k'däm (grave sin) ah kyak ci ciah Papashangpughnang no na m'cä gui ca kyak ci.
I ah kya hleih ci ung, a ghüi ng'vai gui m'htei gui no (honoring) ghüi neh ghün om nak ah bä khäk nak (blessing) na pe gui ci ciah pyein ci.
A cun ah kya hleih a ghüi ng'vai gui mi m'htei gui vai, na mi bä ni ciah mi shüm hmat gui vai hlü ci, i ah kya hleih ci cung ngna mi gui cuh k'kyong khui (family) lah mi na a ghün om vu nak (history) ah a ng'yung (source) ah kyak ci ciah Papashangpughang no na m'thein m'cä gui ci.
https://bit.ly/3MrriLb