Suh-shan nak ah mong Papashangpughang no a na m'thein gui ah mong.

Thursday, November 05, 2020

 

Suh-shan k'tai-güi nak no mi ghün om nak ah mi ghün khaw cuh ng'shung-hei khai ah lam na m'shüm gui ciah kyak ci ciah Papashangpughang no na m'thei m'cä gui ciah kyak ci. A dä-ng'däh ah suh shan vai, ng'dawt hta neh suh shan vai, kä k'pam cai en nak ung phih suh shan vai ciah pyein ci.

Cung kon ung, corona lei awt neh go-pyam ci gui lah a nga-mi gui m'htei gui ciah k'chang gui lah Saya-won gui ka vai ah phih suh mi shan tu pe gui vai na chü-thäm gui ciah kyak ci. Papashangpughang no Bawi Yeisu noh suh a shan nak ung ka mong k'phli (4) ah mong na m'thein gui ciah kyak ci.

A ma pi bäh ah, Khaw k'hngüp tu mat ung ma bäh bäh neh suh shan k'tai-gü nak on tün ma vai ciah pyein ci. Suh mi shan no khaw k'hngüp ät ung kä ng'hlawi nak gui cuh m'chüt hing vai ah k'tha-gui na pe gui ci ah kyak ci. I ah kya hleih ci ung suh suh shan nak cuh k'khanpughi on mi ät tuk ciah kyak ci.

A hngih nak ung, Suh mi shan ung mi m'lung k'tha-gui m'kän neh a däng-däh ah k'thaa na neh mi k'tai-gü vai hlu ci ciah pyein ci. Suh mi shan nak no a k'ni lam täng ah mi ng'thong ng'hlat vai ah lam na m'shüm gui neh kä ng'hlawi nak gui mi bü awt lo ung mi ling gai nak vai ah k'tha-gui na pe gui ciah kyak ci.
 
Cun bäng ah kä kya hleih, Suh mi shan nak no mil mi gui na m'hni gui neh na ghung na m'htei gui ciah k'khanpughi no mik mi gui on bä khäk nak gui na pe gui ciah ki ci ciah Papashangpughang no na m'thein na m'cä gui ciah kyak ci.
 
A k'thum nak ung, Suh mi shan nak no k'khanpughi lah mi paw k'chang gui on na ä hlak gui ciah kyak ci. Mik mi k'chang gui cuh kä k'pam cai en nak ung düüp hta ah om neh mi ng'tai gü vai hlü ciah kyak ci. A cun nah a kä k'pam cai en nak ung k'khanpughi no na ng'thu ng'hta pui gui ciah kyak ci.
 
A k'phli nak ung, Suh mi shan nak no a päng a van cuh k'khanpughi ung ng'yung hlei k'khanpughi ung ka no lo neh k'khanpughi ah ng'hlat neh hteit ba yop ci ah mong cuh na hngüh hmat hlak gui ci ciah Papashangpughang no na m'thei m'cä gui ci.
 
Suh mi shan nak no k'khangpughi lah a tüi pyan gui on ng'ching-ng'khong hleih mi ghün-om ma mong cuh mi ng'shui shem mi hngüh hmat hing vai ah na gung tot gui neh lam na m'shüm gui ci ciah Papashangpughang Francis no na m'thei m'cä gui ciah kyak ci.
 Bawi Yeisu ah suh shan nak mi läk tu ah kya ung no dim kyäp nak lah yei-kyai nak cuh mi hnguk khai ah kyak ci ciah Papashangpughang no na m'thei m'cä gui ciah kyak ci.

 

 

Add new comment

4 + 1 =

Quick Links