Khawm'dek ah dim-kyäp nak ah k'hngüp

Khawm'-dek khan pum ung a dim-kyäp k'hngüp (International Day of Peace)

          Tuh-ngawi September k'cha (21) hngüp cuh (International Day of peace) ciah khaw-m'dek a dim-kyäp nak ah k'hngüp ciah United Nations no (1981)kum ung tün neh a kum tä hleh a shin ah k'hngüp cuh bi vai ciah a khät ah kyak ci.

            Dim-kyäp nak cuh ghuin-khaw a van no a ng'yak hlü, a ng'ngaih-u, ghuin-khaw khong-bang neh bi loh hlük ci gui a van no a mi pyein hti ah k'chü-m'khän, Pahta-taya a van no a mi ng'yak hlü ah ma mong, a kum tä hleih a mi bi vai ah a mi bü-ceng ah ma mong  cuh dim-kyäp nak ah kyak ci. Khaw-m'dek khan ah ng'tung gein nak gui cuh dim-kyäp nak on mi m'thong vai hlü ciah kyak ci. Shin ah khaw-hngüp bi loh ah a k'tung pi ah bü-ceng nak cuh khaw-m'dek pum ung dim-kyäp nak a om vai ah phäh ah dim-kyäp nak a om nak ah khaw gui ung a khan-htek vai, kä om nak pha ung dim-kyäp nak a om lo vai ah phäh ah kyak ci.

            Dim-kyäp nak cuh mi bi phung ung mi gah hin ciah kyak ci. Ng'tung-ah ng'gein-ng'guh nak kä om-en nak ung hang ghün-om cuh nik ci, bä ci, dim-gei ciah kyak ci. Tuh chü cuh khaw-m'dek a dim-kyäp vai bi loh cih gui ni, dim-kyäp nak a khäng-htek vai ah bi loh ci gui mi hnguk gui ci ah kyak ci. A cun ah bi loh ci gui ah hlo ah mik mi gui tu mat hti tu mat hti no cun phih khaw-m'dek a dim-kyäp lo pi hti vai ah ng'lung nan eh mi bi loh vai hlü cih kyak ci.

            Tuh-ghü covid-19 lei a hlo-kang ah ung, k'thaa na pi neh dim-kyäp nak a om vai ah mi bi loh vai hlü cih kyak ci. Khaw-m'dek k'chang gui a van mi kyum-päng yop neh mi ng'ngaih-tüh gui mi m'thong-m'hlai neh, i lah hok-cha ah shin ah lei cuh mi chüt näng vai ci cuh mi ät yop neh mi bi loh vai hlü ciah kya ci. Covid-19 lei ah phäh ah tumat lah tumat ng'shong neh mi om tu pang ah phih, a täng hta ah mi ng'ngaih-tüh gui mi m'chum neh mi ät yop hing ciah kyak ci.

            Tuh-dhu-kum (international day of Peace) ah phäh ah a tung ah (theme-song-pok) lei cuh (shaping peace together) ciah dim-kyäp nak ah mong m'dang ghom vai ciah (theme) ah kyak ci. Tumat lah tumat k'chü-m'gein nak, ng'khong-ng'gei m'hi-ng'kyu nak, ng'ngaih-u nak gui mi m'dang nak on, mi m'dang hlu ah shin ah (IDP) hngüp cuh mi bi hing ciah kyak ci. (UN) on a tang ah mi ng'düi-tho ghom neh m'lung uih tha nak gui ni, tumat lah tumat ng'khoi-ng'chei nak gui kä om en vai ah mi bi loh vai hlü ciah kyak ci. Dim-kyäp nak cuh ng'tung-ah nak kä om en hleih üp-oh hleih ng'ä-ng'cä nak kä om hleih ghün om nak ah kyak ci.

            Bwi Yeisu no, "dim-kyäp nak bi loh ci gui cuh bä ci gui nei, nga mi gui cuh k'khanpughi ah k'hta gui ciah chüi khai gui" ciah pyein ci. Papashangpughang no,"dim-kyäp nak cuh ng'ngaih-u nak ah lam ah kyak ci, a cun ah lam ung a k'ni pi lam tang ah ng'thong-ng'hlat nak, ng'khong-ng'gei nak lah ng'thu-ng'hta hlu gui am dim-kyäp nak lam ah mi päng hing ciah kyak ci"ciah pyin ci. A van ät-hat neh mi om hlu ah mi khaw-m'dek dim-kyäp khai ah mi pyang ko.