Mayk'cha (31) k'hngüp cuh World No Tobacoo Day ah kyak ci.

May k'cha (31) k'hngüp cuh World No Tobacco Day ciah khaw m'dek pum ung shei awk nak kä om en ba vai ah k'hngüp ci neh a kum täi hleih bi vai ah World Health Organization (WHO) ng' bum no k'hngüp a khät ah kyak ci.

Shin ah k'hngüp a mi khät ah a k'tung pi ah a mi büi ceng nak cuh i ang ci ung, shei awk ah phäh ah lei (diseases) ah hlo kang nak gui, mi kyä ah gai gong nak gui di dam hlak neh shih kyuk nak gui om hlak ca kya hleih u no phih shei kä geit ko en ba vai lah, u no phih shei kä awk en ba vai ah k'chang gui a mi k'hnga-k'plang nak ah kyak ci.

Tuh shu kum, 2022 kum ung, World No Tobacco Day ung a k'tung pi ah bi oh vai ah a mi büi ceng nak ah (theme) cuh i ang ci ung, "Protect the environment" ciah khaw m'dek k'pei-ng'leng (environment) ghuin m'htei vai ah mong ah kyak ci.

Shei geit ko neh shei awk ah phäh ah lei (epidemic) gui hlo neh, khaw m'dek pum ung k'chang gui ah pum kyä gai gong nak (health) di dam neh k'chang gui shih kyuk nak (death) gui kä om en ba vai ah hloi hlak vai ah phäh ah World No Tobacoo Day cuh (1987) kum ung WHO ng'bum no tün neh a bi lo ah kyak ci.

Shei a mi awk ka phäh lah a cun ah shei on ma ng'gui-khong hleih a mi bi loh ei-awk gui ah kyak ca Cigars, cigarettes, e-cigarettes, smoking hookah, chewing tobacco lah shei on a mi pyan ah a hei a mi ei-awk htung-mang gui ah phäh ah a kum tä hleih k'chang gui (8 million) cuh shik ci gui ah kyak ci ciah (world health organization-WHO) no pyein ci.

Shei (tobacoo) geit ko neh, yoih tuk, bi loh tung-mang, ei-awk ah phäh ah k'chang gui ah kyä-hla ah gai gong nak di dam hlak neh shik kyuk nak gui om hlak ca kyak ci. Cun bäng ah kä kya hleih, mi om nak ah (environment) ciah khaw m'dek k'pei-ng'leng cun phih di dam hlak ca kyak ci.

A cun ah kya hleih WHO no (2008) kum ung ka no tün neh shei gui yoih tuk bi loh hlum-lei nak gui (advertisement or promotion of tobacoo) cuh kä bi ba vai ciah pyein ca kyak ci.

A cun ah shei gui geit ko neh, yoih tuk, bi loh tung-mang, ei-awk nak ung China ghuin khaw cuh a k'da pi mäh bi tu pi ca kya neh khaw m'dek pum ung om ca shei gui geit ko neh, yoih tuk, bi loh tung-mang, ei-awk  nak ung ka (30%) cuh China ghuin khaw ung a mi bi ah kyak ci ciah 2014 kum ung shui shem neh a mi hnguh hmat nak om ca kyak ci.

Khaw m'dek pum ung shei (tobacoo) geit ko neh, yoih tuk, bi loh tung-mang, ei-awk nak gui kä om en ba vai ah a van no mi thäi-hla neh mi bi loh ät ko.

https://www.rvasia.org/history/world-no-tobacco-day