Ng'thei-ng'thang hnguh-hmat nak(education) ah mong lah k'kyong-khui.

Khaw m'dek pum ung (Education) ciah Ca ng'thei-ng'thang hnguh-hmat vai ah bü-ceng neh a mi bi loh nak gui ung k'kyong-khui gui cuh a k'htük pi ah ng'thei ng'thang hngu-hmat nak ah a kya vai hlü ci ciah Papashangpughang no pyein ci. October k'cha (15) hngüp ung Roma mang-go ung om ciah a k'hlüng pi ah ca ng'thei nak ah kyong ung ng'bum u neh khawm'dek khan pum ung ah ng'thei ng'thang hngu-hmat nak vai gui ah mong a mi ni-nak, a mi pyein k'hlak nak ung Papashangpughang no a cun ah a pyein ah kyak ci.

A cun ah ca ng'thei hnguh-hmat nak vai gui ah mong bi loh nak vai gui ung a coyah ng'bum gui ni, pa-hta ng'bum gui ni lah k'chang päng van noh ng'lung na neh bi loh ghom vai hlü ci ciah pyein ci. Hngu-hmat ng'thei ng'thang nak k'chang gui ah ni bä nak ah mong lam ah kya neh mik mi k'chang gui no a ng'shon tä hleih mi na-a ng'daw vu ah kyak ci ciah pyein ci. Ca ng'thei ng'thangt hngu-hmat nak cuh k'chang tumat ah hang ghün-om nak ung  ni bä pi ciah kya hleih k'kyong-khui gui ung tün neh ma bäh bäh neh tün-pong neh bi loh vai ah hlü ciah ma mong ah kyak ci.

Ca ng'thei hngu-hmat ng'thei ng'thang nak cuh ghuin-kho khong-bang bi loh nak vai ung ni, hlum-lei ang-pan nak vai gui ni lah k'chang gui ah ni bä nak vai ah mong bi loh nak vai gui ah phäh ah a kya ah hlü ci ciah mong gui mi hta-hmo gui ni k'hmo-tho gui on mi m'thein gui vai hlü ci ciah Papashangpughang no pyein ci. Khawm'dek mi ghuin m'hti, mi pyan-them vai ah phäh ah a k'hmo gui a van a mi hngu-hmat a mi ng'thei ng'thang tu hing vai, a mi hlüng tai tu vai ah bi loh vai ciah pyein ci.

https://bit.ly/3dtBAdG