October k'cha 10 k'hngüp cuh World Mental Health Day (WMHD) ah kyak ci.

A kum tä hleih October k'cha a gha nak (10) cuh World Mental Health Day (WMHD) ciah k'chang gui a van m'lung a gai gong vai ah k'hngüp ciah khaw k'dek pum ung thä-hla neh bi loh vai ah a mi khät ah k'hngüp ah kyak ci.
Shin ah World Mental Health Day (WMHD) ciah k'chang gui a van m'lung a gai gong vai ah k'hngüp a mi khät ah a k'tung pi ah a mi büceng nak cuh i ung ci ung, k'chang päng a van cuh kyä-hla pum kyä a gai gong vai ah bi loh ah hlo ah m'lung cha gai gong neh ghün om vai ah phäh ah kyak ci.
2013 kum ung ka no tün neh, shin ah World Mental Health Day (WMHD) ciah m'lung a gai gong vai ah k'hngüp cuh World Health Organization (WHO) ng'bum no tün pong neh a bi lo ma ah kyak ci.
World Mental Health Day (WMHD) ciah m'lung a gai gong vai ah k'hngüp ah phäh ah 2022 kum ung a k'tung pi ah büiceng neh bi loh thä-hla vai ah a mong (theme) cuh i ang ci ung, "Make mental health a global priority for all" ci neh a mi pyein ah "k'chang gui a van ah m'lung a gai gong vai cuh a k'tung pi ah bi loh vai" ciah ah kyak ci.
2019 kum ung hngu-hmat k'chang gui no a shui shem nak ung, k'chang k'cheit ung ung ka, k'chang tumat cuh a k'lung kä gai gong ci (mental disorder) ciah a mi hnguh hmat nak om ca kyak ci.
A cun ah k'chang gui ah m'lung kä gai gong nak gui cuh i gui ang ci ung, lei a hlo kang ni, ghuin khaw kä dim kyäp neh ng'tung-ah nak gui a om ni, k'kyong khui kä dim kyäp ni, hlui ei vai kä ng'hloi-hlak nak gui ni, hlum-lei ang-pan bi loh gui kä ng'hlo gui ni, ghun khaw kä nik ci vai hlü ah ng'ngaih nak gui lah nu-pa phäi -na gui ni, nu-be ng'kho k'chang gui shih kyuk go-pyam nak gui mi büi-awt gui ah phäh ah kyak ci.
A cun ah kya hleih, khaw m'dek k'khan ah mi hang ghün om nak ung, a cun gui ah kä ng'hloi ng'hlak ca thüi-hlei bong-bai nak gui mi büi awt yah ung mi m'lung mi pyang tham neh, ng'ngaih na neh mi ghün om thei vai hlü ca kyak ci.
A cun ah kya hleih, shiin ah World Mental Health Day (WMHD) ciah m'lung a gai gong vai ah k'hngüp bi loh hlu ah, ghuin kahw khong bang ci gui ni, pa-hta khong bang ci gui lah a hei ng'bum gui avan no k'chang päng van ah m'lung a gai gong vai ah ät neh bi loh vai hlü ca kyak ci.