March k'cha a k'cheit nak (8) k'hngüp cuh Intetnational Women's Day ah kyak ci.

Tuesday, March 08, 2022

Tuh ngoi March k'cha a k'cheit nak (8) k'hngüp cuh Intetnational Women's Day ci neh a mi pyein ah k'hngu mi gui (women) ci ah a kum tä hleih bi vai ah a mi kät ah k'ngüp ah kyak ci.

A shin ah International Women's Day (IWD) k'hngüp a mi kät ah a mi bä ceng nak cuh i ang ci ung, k'hngu mi gui no khaw m'dek k'chang gui ah hlüng-tai bä khäk nak gui a mi bi loh nak gui shüm hmat nak gui lah, hngu mi gui no a mi biloh gah tang vai gui (Rights) a k'be ah a mi gah tu hing vai, hngu mi gui cuh k'pa mi gui on ng'coih neh a mi ghün om tu hing vai (gender equility) ah phäh ah kyak ci.

Mi om nak ah khaw m'dek cuh bä lo pi neh hlüng tai lo pi hti te cuh mah, ghuin khaw gui tu mat ung phih (gender equility) ciah hngu mi gui lah k'pa mi gui ng'coih neh ng'bi-ng'loh ghün om nak kä om phak ci ciah United Nations ng'bum no pyein ca kyak ci.

A cun ah kyak hleih kum (2030) ung cuh khaw m'dek khan pum ung (gender equility) ciah hngu mi gui lah k'pa mi gui ng'coih neh ng'bi-ng'loh ghün om nak cuh a k'be ah a om hing vai ciah United Nations no a bä ceng nak om ca kyak ci.

Shin ah International Women’s Day (IWD) bi hlu ah, khaw m'dek pum ung k'hngumi gui no a mi bi loh m'chüt näng gui lah ling m'hteng neh a mi bi loh gui shüm hlmat nak vai lah bi loh ma mong gui hlüng tai bä khäk nak (progress) a om lah i gui cuh m'hteih neh dan nak ba ah kak ci ciah UN ng'bum no pyein ci.

Tuh-shu-kum United Nations ng'bum no International Women’s Day (IWD 2022) ah phäh bü-ceng neh a biloh vai ah k'chü m'kha (theme) cuh “Gender equality today for a sustainable tomorrow.” ciah k'hngumi k'paami ng'coih yop neh ngoi ah chüt ah ni bä nak gui vai bi loh vai ciah a mong ah kyak ci.

Khaw m'dek pum ung k'aa mi ghui ah tah k'hngumi gui cuh 23% kyen tu ba hleih gah m'tang ci gui ah kyak neh, khaw m'dek pum ung ah ghuin khaw khong bang bi loh nak (Parliamentary Seats) ung (24% vah ng'bing-loh tuk ci gui ciah United Nations no shui ahem neh a hnguh hmat nak om ca kyak ci.

March k'cha (8) k'hngüp ung cuh kaw m'dek pum ung k'hngumi k'paa mi ng'coih neh bi loh ghün om vai ah thä-hla nak guiah kyak ca (seminars, marches, and concerts, the events) gui a päng päng bi loh ci gui ah kyak ci.

A m'shah ghuin khaw gui ah kyak ca ( Angola, Armenia, Azerbaijan, Belarus, Burkina Faso, Cambodia, China (half-day for women), Eritrea, Germany (some areas), Georgia, Guinea-Bissau, Kazakhstan, Kyrgyzstan, Kiribati, Laos (women only), Madagasgar (women only), Moldova, Mongolia, Nauru, North Korea, Russia, Sierra Leone, Tajikistan, Turkmenistan, Ukraine, Uganda, Uzbekistan, and Zambia) ghuin khaw gui ung International Women's Day k'gnhüp cuh (Public holiday) k'hngüp ah khät ci gui ah kyak ci.