Ng'phlän ci ah kum 100 yah ung K'cho gui ah ih om man gui

K'cho pughipa gui naw kum 100 kä gawk pha ung ami ih om lah ami hlui hlak ami ei awk man gui ng'shi k'ca nak k'kya ci. K'cho k'hnumi gui naw k'cho k'hni ami m'khuk lu kä yu k'pha khai ah hla man ci gui. K'pami gui naw k'chi k'pom hla man ci gui.K'chi k'pom cuh bek k'thum vah law man ci. English naw a uk yah chüh hlei m'va hlui u naw kä hlui man ci. K'pami gui cuh yih khang man ci gui, yih a khang tu vai kä om ci naw i kä hlui hlak ah om man ci gui. A k'hmaw hta gui phi i kä hlui hlak ah om man ci gui. Ng'büh ng'mang ci naw a hta am pum m'hlui m'thuh man ci. Pumhlui cuh ma täng ah gui on m'kaih neh hnu täng ah yih hta ng'bat khai ah ng'thuh man ci gui. K'hnumi gui naw ami khaw kum 13 hlawk a law ung leng neh ami ng'mang ghuk man ci gui. Pighi gui avan naw ami ng'mang gu man ci gui, a ng'mang kä guk tu ci cuh kä kyom ci kä bä ci nei ci neh pyein man ci gui. A cun ah hlaw ah a ng'mang guk ci cuh van naw m'kyom man ci, k'hnumi hta gui ami van naw ami ng'mang gu tu hlu man ci gui. Ami ng'mang ami guk yah ung mui ng'hlin on gu man ci gui, ami guk yah ung a na ah nak hlei kyap neh gu man ci gui. 

 K'bi gui kä om hlei k'phla shon neh bung ah ka phih k'hlawk neh k'bi gui ah pyang man ci gui. A le ami ng'yah hlu ung m'htai mei m'khu neh k'am khu le ung ka la ba neh k'phla on m'dawn neh shon man ci gui. A bawk ami ng'yah hlu ung a i on phi ka k'con ba neh a täng ah pyang man ci gui. A ng'ai yah hlu ci naw k'chawk k'ai co neh k'phla on m'don neh shon ci gui. Cun kawn ah um kawi lah gaw htung on ami pyan ah k'hmui htung ung k'pyui neh k'bi gui ah kya law khai ah pyan man ci gui. Um hta bät hta lah hlei k'ki ung yu awk man ci gui. Buh ami ei ung dawn ung ei man ci gui. K'chang k'hli naw ami ei vai ah akya ung k'pya ung ei man ci gui. Antui ami awk ung ei k'bei ung awk man ci gui. Ami mät naw ami pyan ah m'dek k'am ung buh ni yu ni shon man ci gui. 

 K'hnumi k'pami ami van naw ami lumu kä k'tei man ci gui, ami van naw ami lu k'htui man ci gui. Englaish naw a uk law kon ah English naw alaw pui ah k'boi len om man ci acun on k'pami gui ami lu pawn man ci gui. A cun ah alu pawn ci cuh kyom ci ah ng'ngai man ci gui. Bi bi lo hlawk ci ah a kya kaw kawn ah phi a m'shah naw i kä hlui man ci. Anu ng'khüi ci naw vah k'phla shon neh a hta am m'hlak man ci. A cun ah anu naw a m'hlak ung a phäi naw hlah hlei a na naw hla tu hlu neh a m'hlaw ung aphäi naw m'hlak tuman ci. Tumat naw a hlak ba yah ung tumat cuh i kä hlak ah om ci. A cun ah ng'thawn thawng neh hla ma ci gui. Yuhlak ei awk nak ung ami hteh hton ung phi i kä hlui ah om man ci gui. A cun ah a u naw phi i kä hlak ah om u hlei u naw i ah kä ng'ngai man ci.

K'chang teih law ci naw k'khim pem k'bah man ci. K'pami naw k'khim pem cuh a khaw ng'däh ah k'bah ci. Li k'khim k'htei  lah hle hneh on hla kap man ci gui. K'htei on cuh m'nga ng'bu shui neh ngaon man ci gui. Ami k'htei on m'nga a ng'kom gui ngon man ci gui. Hle nghneh on ngon ci ah tah li on ngaon ci vah bä bi man ci. Ka ng'kyon li on ka ngon ci neh ng'ta ma ci gui. 

 A cun ah vah K'cho pughipa gui om man ci gui ci neh a khaw kum 96 law ci ah pighi Naing Ha Shen ng'baw ah ka naw pyein ci. A ni cuh tuhchü Mandat manggo ung om ci ah FMM Mamah gui naw ami m'htei ah Pughipa ng'vai gui m'htei nak Fountain of Love Elderly Home ung om ci ah kya ci.

Add new comment

3 + 7 =