Tuh ngoi September k'cha (8) k'hngüp cuh "International Literacy Day" ah kyak ci.

Tuh ngoi September k'cha a cheit ng'hngüp (8) cuh (International Literacy Day) ciah ng'thei ng'thang hnguh hmat nak ah k'hngüp ciah United Nations ng'bum ah k'kaa ah om ca UNESCO ng'bum no hngüp a khät ah kyak ci.

(Literacy) ci cuh i ang ci ung, ca gu thei neh phat thei (k'chei thei) nak ah kya neh ca kä gu thei neh kä phat thei (kä chei thei) ca k'chang tumat no hlüng tai neh kä ghüng om hing ci ciah Colin Dictionary no k'phlan ca kyak ci.

Ca guk thei phat thei no a k'ni pi ah hngüh hmat nak cuh gah hing neh, hngüh hmat nak cuh hlüng tai nak ah kyak ci.
Du-khaih nak, du-dong nak lah ca kä guk thei, kä phat thei cuh om kya lok ca kyak ci. Du-dong nak no cun phih ca guk thei phat thei vai ah ng'thei ng'thang nak tu vai ah lam m'kang ca kyak ci. I ah kya hleih ci ung, du-dong ca k'kyong khui no cuh a ei vai shui shem neh ng'bik ca kya neh ca kä ng'thei ng'thang tu hlot ca kyak ci.
 Ca ng'thei hngu hmat nak no k'chang gui du-dong nak cuh kyen hlak neh k'chang gui ah gai-gong nak lah hlum-lei awng-pan nak gui cuh ni bä hlak ca kyak ci.
South Africa ghuin khaw khong bang man ca a ng'vai hta Nelson Mandela no, "Education is the most powerful weapon with which you can change the world" ciah pyein man ca kyak ci. A pyein hlu cuh in ang ci ung, Ca ng'thei-thang hnguh hmat nak cuh khaw m'dek pum ng'thong hlat khai ah pyan tham nak ah hle-het ah kyak ci caih pyein ci.
 K'chang gui ah a mi bi loh hngün thoh nak gui ung ng'thei ng'thang hnguh hmat nak hlü ca a mong cuh k'chang päng van no a hmat vai hlü ca kyak ci.
A cun ah mi hnguh hmat tu hing vai ah phäha ah ca-uk (books) a k'ni gui cun phih k'chei phat vai hlü ca kyak ci.
Literacy cuh yai-ca gein vai nak ung ka no ng'ngaih u nak (from misery to hope) ah k'hlei (a bridge) ah kyak ci ciah United Nations ng'bum ung a ng'vai hta ah kya man ca (former Secretary-General of the United Nations) Kofi Annan no pyein ca kyak ci.
A cun ah kya hleih, mi om nak ah khaw m'dek lah k'chang gui ah ni bä lo pi hti vai ah phäh ah k'chang päng van no, ca ng'thei hnguh hmat nak a gah tu hing vai ah lam mi m'shüm gui neh, mi k'tha nak vai hlü ca kyak ci.
1967 kum ung ka no tün neh, September k'cha a k'cheit k'hngüp (8) ung  "International Literacy Day (ILD)" ciah ca ng'thei hngu hmat nak ah k'hngüp cuh a kum tä hleih bik ci gui ah kyak ci.
 Shin ah International Literacy Day cuh 1966 kum tün neh United Nations Educational, Scientific, and Cultural Organization (UNESCO) ng'bum no a k'tük ah abi lo ah kyak ci.
 Khaw m'dek pum ung k'chang gui  ca ng'thei hngu hmat ci a daa lo tu pang ah phih, 771 million cuh ca kä ng'thei kä hngu hmat tuk ci gui ah kyak ci ciah UNESCO ng'bum no shui shem neh a hnguh hmat nak om ca kyak ci.
2022 kum ah phäh ah ILD ng'bum ah (theme) cuh "Transforming Literacy Learning Spaces" cah kyak ci.
2020 kum ung, covid lei a hlo lo ah phäh ah a k'hmo gui .6 billion cuh kyong kä kai tu ba hing ci gui ah kyak ci.
Education ciah ng'thei ng'thang hnguh hmat nak cuh k'chang päng a van, tumat phih kä k'poih en hleih a mi gah tu vai hlü ca kyak ci. A cun ah a mi ng'thei ng'thang tu hing vai ah k'chang gui avan no mi bi loh, mi k'tha nak vai hlü ca kyak ci.

K"chang gui avan no, ca ng'thei hnguh hmat nak a mi gah tu vai ah a van no mi k'tha na ko.

https://bit.ly/3AYo7Xl