Bäca Nichola Bunkerd Kitvamruneg ah a mong.

Thailand ghuin khaw, Bangkok Diocise no Bawiphaya Nicholas Bunkerd Kitvamruneg, bä ca ng'chang ah a mi k'bäi nak kum m'ku-lei-goi (22) nak shüm hmat nak ba cuh bi ci gui ah kyak ci.

Corona lei a hlo kang tu pang ah phih k'chang phya (100) hlok cai ng'bum u neh a mi ngon (maytyr) nah bawiphaphaya a ng'ming thang pi ca  Father Nicholas Bunkerd a mi k'phuh nak (shrine), Sampran ah hteit neh ng'bum ci gui ah kyak ci.

A cun ah a mi k'phuh nak ah Sampran cuh Thailand ghuin khaw, Bangkok mang-go ung ka no (44) kilomiters ng'lak nak ca kyak ci.

Papashangpughang John Paul II no kum (2000), March k'cha a k'hma nak (5) k'hngüp ung Father Nicholas Bunkerd Kitbamrung cuh Rome Mang-go, Saint Peter's Square ung (Blessed and Martyer of faith) ciah yum nak ah bä ca k'chang ah a k'bäi ah kyak ci.

Bawiphaya Nicholas cuh 1926 kum ung Thailand ghui khaw, Bangkok mang-go ah Assumption Cathedral ung Bawiphaya ah kya lo tuk ca kayk ci.

Bawiphaya Father Nicholas Bunkerd Kitbamrung ah kum (22) nak Bäca k'chang ah a mi k'bäi nak ung Bangkok diosese ung ah Catholic pa-hta k'chang gui ng'bum neh a mi k'taigüi yah ung.

Franch ghuin khaw lah Indochina ghuin khaw a ni ng'tuk yah ung Bawihapya Nicholas cuh Franch ghuinkhaw ah (spy) ciah a mi k'puk ah kyak ci.

1941, January k'cha (12) ung Bawiphaya cuh Sunday Mass vai ah phäh ah khong-long (bell) tum neh pa-hta k'chang gui a chü gui ah phäh düit ah pha u neh a k'sho Thong (imprisonment) a mi chum ah kyak ci.

Bawiphya cuh Thong-im ah k'kyong ah k'khanpughi ah ng'thuni cuh m'thei gui neh, suh shang neh om neh tah 1944 kum, January k'cha 12 k'hngüp ung shik ca kyak ci.

Bawiphaya Nicholas Bunkerd Kitbamrung cuh Thailand ghuin khaw a htin-taw ah phäh ah k'khanpughi no a na peit gui ah (gift) ah kyak neh a ni cuh k'khanpughi on a ghün nak m'ap neh bi a bi nak lah k'khanpughi yum nak ung thei-bang tu vai ah k'chang-ni ah kyak ci ciah Father Somphop Roenwutichnapheat no pyein ci.

Bawiphaya Father Nicholas Bunkerd Kitbamrung 1859 kum, January k'cha 31 k'hngüp ung Nakhon Pathom (Cantral Thailand) ung ng'tü ca kyak ci.

Bäca (Blessed Father Nicholas Bunkerd Kitbamrung) ah (relics) ami  tha na ung Bawiphya Father Somphop Roenwutichnapheat no Mass a gän-ap yah ung.

https://bit.ly/3KOcMwt