Dim-kyäp nak a om vai ah k'tai-güi vai.

Russia ghuin khaw no Ukraine ghuin khaw a tuk-ah yah phäh ah yai ca gein vai ca k'chang gui ka vai ah phäh ah suh shan k'tai güi tu pe gui vai ah Papashangpughang no na m'thein m'kan gui ca kyak ci.
March k'cha a k'ngih nak (2) Wednesday k'hngüp ung ei awk gui kyün-hloi neh (Prayer and Fasting) Ukraine ghuin khaw a dim kyäp vai ah bü ceng neh suh shan vai ciah Papashangpughang no mi van na chü-thäm gui ca kyak ci.
Shin ah March k'cha a k'hngih nak k'hngüp cuh a tung pi ah Ukraine k'chang gui on suh shan nak on mi ät tu u neh ng'tung-ah nak gui kä om en ba vai ah k'khanpughi ah mi ng'hui nak lo ciah Papashangpughang no pyein ci.
Ng'tung-ah pyang tham ca k'chang gui no k'chang gui i ah kä hlui tä lo ba ci gui ah kya neh, k'chang gui ah hngun ghün nak cun phih i ah kä hngu tu u neh a mi mät ah gah-m'tang nak vai, ami mät ah ng'ming thang bä-khäk nak vai bäng ng'ngaih tüih ci gui ah kyak ci ciah Papashangpughang no na m'thein m'cä gui ca kyak ci.
A cun ah ng'tung-ah vai pyang ci gui ah k'chang gui cuh (weapons) hle-hat äp-chap u neh k'khanpughi ah ng'yak hlü on ng'che-ng'tai khai ah om u neh, dim kyäp hleih om ca k'chang gui on a hla ah om ci gui ah kyak ci ciah pyein ci.
Ng'tung-ah nak a om ah kya ung, a mi bü ah om ei ci gui ah k'chang gui ah yai ca gein vai neh shi-kyuk ci gui ah kyak ci ciah pyein ci. A tung pi ah a ghü-ng'vai lo gui lah a k'hmo hta gui cuh gein vai ci gui ah kyak ci ciah pyein ci.
Khaw m'dek k'khan ah ng'tung-ah nak a om nak ah guin khaw gui ka vai ah phih kä k'hmih en vai, a tung pi ah Yemen, Syria, and Ethiopia khaw ung ka gui ah phäh ah phih suh shan pe gui vai hlü ci ciah pyein ci.
Hle-hat gui dim yop hlä (May weapons be silenced!) ciah pyein neh dim kyäp nak vai ah bi bik ci gui cuh k'khanpughi no om pui gui hlä ci ah Papashangpughang no pyein ci.
https://bit.ly/3K15Onn