Pa-hta gui ät neh a mi bi loh ah mong.

Christians gui ni, Buddihists gui lah Muslims gui a van a ng'don ah 1500 cuh pa-tha gui päng ät yop neh k'chang yoih-tuk nak (human trafficking) kä om en ba vai ah ng'shui ng'vai neh bi loh nak cuh September k'cha 29 k'hngüp ung Canbodia ghuin khaw ah bik ci gui ah kyak ci.

A cun ah a mi bi loh nak ung, Cambodia ghuin khaw khong bang ca Samdech Hun Sen, (Prime Minister of the Kingdom of Cambodia) no khong bang neh a mi loh pui gui ah kyak ci.

A mi bi loh vai ah a k'tung pi ah a mi büiceng ah a mong cuh "Do not use Cambodia as a destination for trafficking in persons" ciah Cambodia ghuin khaw cuh k'chang gui yoi-tuk ca ghuin khaw ah kä kya en vai cia büceng neh a mi bi loh ah kyak ci.

"pa-hta gui a van ät yop neh k'chang yoih tuk nak kä om en ba vai ah mi bi loh vai hlü ci" ci neh Cambodia ghuin khaw khong bang ca Samdech Hun Sen, (Prime Minister of the Kingdom of Cambodia) no pyein ca kyak ci. I ah kya hleih ci ung k'chang yoih-tuk nak cuh Cambodia ghuin khaw bäng ung kä kya hleih khaw m'dek pum ung om ca ghuin khaw gui ung om ca kya hleih a van no ät neh mi bi loh vai hlü ci ciah pyein ci.

Caritas Cambodia no tün pong hleih, Cambodia ghuin kahw ung pa-hta gui a van ät neh (human trafficking) ciah k'chang yoih-tuk nak kä om en ba vai ah a mi bi nak cuh 2016 ung ka no tün neh a mi bi ah kya neh, kum k'chuk (6) lo lok ca kyak ci.

Pa-hta gui ät neh k'chang yoih-tuk nak kä om en va vai ah bi loh nak ung ng'shui ng'yei tuk ci gui ah mui m'dang nak.

"Pa-hta gui a van mi ät neh, mi k'tai güi neh, k'chang gui ah ghün om nak (human life) mi ghung m'htei neh, k'chang gui ah ni bä nak vai lah dim-kyäk nak a om vai ah a täng ah mi bi vai hlü ci" ciah Msgr. Enrique Figaredo (The Apostolic Prefect of Battambang) no phih pyein ca kyak ci.

"ghuin khaw khong bang ci gui on mi ät neh, k'chang yoih-tuk nak kä om en ba vai ah mi pa-hta k'chang gui on mi mi thei m'thang gui vai hlü ci" ciah Samdech Preah Puth Chey Mony Khim Sorn, (the chief Buddhist monk of Phnom Penh city) no phih pyein ca kyak ci.

K'chang gui yoih-tuk nak (human trafficking) kä om en ba vai ah bi loh vai ah k'hngüp cuh a kum täi hleih August k'cha 20 k'hngüp ung bi vai ah Cambodia ghuin khaw a ng'vai hta Prime Minister Hun no k'hngüp a khät ah kyak ci.