Khaw m'dek ghuin m'htei vai ah k'hngüp lah khaw k'dek ka vai ah k'tai güi nak.

September k'cha a tük k'hngüp (1) ung ka no October k'cha a k'phli nak (4), bä ca St. Francis of Assisi ah poi k'hngüp ah chüt ah (the Season of Creation) ciah k'khanpughi ah a tüi pyan gui mi ghuin m'htei vai lah mi om nak ah khaw m'dek ah phäh ah a k'tung ah k'tai güi vai ciah pyein ci gui ah kyak ci. Shin ah khaw kum ah phäh ah (theme) ah kyak ca a k'tung pi ah bi loh ng'ngaih tüh vai cuh, "Listening to the Voice of Creation." ciah kyak ci. Papashangpughang Francis no a guk ah (Laudato Si) ung ka, khaw m'dek ka vai ah k'tai güi nak (A Prayer for Our Earth -from Laudato Si') A i phi m'chüt näng ca k'khanpughi aw, nang bawi cuh khaw m'dek k'kaa, khaw k'dek k'khan pum ung om ca na tüi pyan gui a van ung na om ca kyak ci. A cun ah na tüi pyan gui a van cuh hngip hmoih ca na kut on na k'bawp hta yop ah kyak ci. Kyom tang nak lah hngun ghün nak ka mi ghuin m'htei vai phäh ah m'hni nak ah k'tha gui na pe gui ä. A u phih kä ploh cheih en neh, ng'nung-be ng'phäng-na yop vai hlü ah ka mi ghün om vai ah phäh ah dim gei nak on na k'be gui ä. O yai ca ci gui ci m'htei ca bawi aw, khaw m'dek khan ah om ca a mi got en, i ah kä mi hlui tä gui te, nang bawi ah mik ung a phu k'kyüi gui ka mi k'phon tu gui hing vai ah na gung tot gui ä. M'di m'dap nak gui kä kya en hleih, kyom-tang nak gui ka mi phu-sho hing vai ah phi kai, Khaw m'dek kä m'di m'dap en neh ka mi ghün m'htei vai ah phäh ah, ka mi ghün om nak ung gai gong nak na pe gui ä bawi aw. A mi bät ah bä ng'mang nak vai ah phäh ah, Khaw m'dek m'di neh, du k'khai ca k'chang gui ah a ghün lu gui m'di ci gui ah k'chang gui ah m'lung cuh m'thong m'hlat pe gui ä bawi aw. Nang bawi ah na tüi pyan gui a van ah, ni bä nak gui ka mi hnguh hmat hing vai ah na m'thei m'cä gui ä bawi aw. Nang bawi ung a ng'däih ah a k'khang nak ah lam ung ka mi gok lo tu hing vai ah kami hteit ton ät ca nang bawi ah na tüi pyan gui a van on ka mi ät ah a mong cuh ka mi hnguh hmat htei vai ah na m'thei m'cä gui ä bawi aw. A khaw k'hngüp tä hleih, kei mi na om pui gui ah phäh ah, a ng'täi ah ka mi ning shüm hmat ci nei bawi aw. Dim gei nak, m'hni nak lah ta-ga nak a om vai ah phäh ah ka mi k'tai güi nak gui lah, ka mi bi loh nak gui ah k'khan ah k'tha gui na pe gui ä bawi aw.

https://www.rvasia.org/video-content/prayer-our-earth

Add new comment

15 + 1 =